Foto: richmondandtwickenhamtimes.co.uk
Ostrvo sačinjeno od vlažnih maramica veličine dva teniska terena formiralo se na obali Temze u Londonu i promijenilo tok rijeke, piše list Tajms.
Britanski ministri apeluju na ljude da prestanu da koriste vlažne maramice, a vlasti razmatraju potpunu zabranu onih koje sadrže plastiku.
Fler Anderson, poslanica laburista, upozorila je građane da se vlažne maramice koje bace u vece šolju ne razgrađaju već završe u Temzi.
„Ostrvo veličine dva teniska terena formiralo se kod Hamersmit mosta. U nekim dijelovima je sloj maramica deblji od jednog metra. Zapravo je promijenilo tok Temze“, navodi Andersonova.
Poslanica je predložila potpunu zabranu proizvodnje i prodaje vlažnih maramica koje sadrže plastiku, ali priznaje da joj je za to potrebna veća podrška.
Većina vlažnih maramica proizvodi se od plastike koja se ne razlaže kada se pusti voda, navodi organizacija za zaštitu životne sredine „Temza21“.
Ne samo što se ne razlažu, već oslobađaju mikroplastiku koja dalje nanosi štetu čitavom ekosistemu.
Iz organizacije „Temza21“ navode da se ostrvo formiralo za manje od pet godina, da je na nekim mjestima poraslo za 1,4 metra i pokriva površinu dva teniska terena.