Foto: Tanjug
Njemački avioni sposobni za praćenje ruskih podmornica počeće sa operacijama uz obalu Škotske već sljedeće godine, u okviru odbrambenog sporazuma koji će biti potpisan između Londona i Berlina.
Novi sporazum, nazvan “Triniti haus agriment” (Trinity House Agreement), koji će potpisati ministar odbrane Džon Hili i njegov njemački kolega Boris Pistorijus, takođe će omogućiti njemačkoj odbrambenoj industriji da u Britaniji otvori fabriku za proizvodnju cijevi za artiljerijska oružja, prenio je Skaj njuz (Sky news).
To će biti prvi put u deceniji da se takvo oružje proizvodi u Velikoj Britaniji.
Ministar Hili opisao je taj sporazum kao “prekretnicu” u odnosima između Britanije i Njemačke, naglašavajući da će to doprinijeti jačanju evropske bezbjednosti.
“Sporazum bez presedana obezbjeđuje novi nivo saradnje sa njemačkim oružanim snagama i industrijom, donoseći koristi za našu zajedničku sigurnost i prosperitet, štiteći naše zajedničke vrijednosti i jačajući naše odbrambene industrijske baze”, rekao je on.
Ministarstvo je napomenulo da su Velika Britanija i Njemačka “najveći potrošači odbrambenih sredstava u Evropi”. Britanija takođe ima bliske odbrambene veze sa Francuskom.
Pistorijus, koji je u Velikoj Britaniji kako bi potpisao novi sporazum, rekao je da se Berlin i London sve više približavaju.
“Zajedno ćemo povećati naše odbrambene sposobnosti, jačajući evropski stub unutar NATO-a”, rekao je on.
Sporazum takođe uključuje zajednički rad na razvoju “podmorskih nadzornih kapaciteta”, s planiranim nemačkim avionima za lov na podmornice, P8-Posejdon, koji će povremeno operisati iz baze Kraljevskih vazduhoplovnih snaga u Škotskoj.
U okviru ovog sporazuma, njemački avioni bi u budućnosti mogli da budu naoružani britanskim torpedima, dok će njemačka fabrika za proizvodnju cijevi za artiljerijska oružja otvoriti više od 400 radnih mjesta u Britaniji.