Krajem januara će se održati sastanak pregovarača Grčke i Makedonije i posrednika iz UN Metjua Nimica, a tada bi na stolu mogla da se nađu tri prijedloga za ime Makedonije.
To su Nova Makedonija, Sjeverna Makedonija i Gornja Makedonija, ali se ne isključuje ni neki novi prijedlog.
Juče su pojedini albanski mediji prenijeli da je postignut dogovor oko toga da se država nazove Republika Nova Makedonija ili kraće Nova Makedonija.
Otkud baš ovaj naziv?
Kalipso Nikolaidis iz Grčke, profesor međunarodnih odnosa na Univerzitetu Oksford, i Veton Ljatifi iz Makedonije, profesor međunarodnih odnosa na Univerzitetu jugoistočne Evrope u Tetovu su 12. decembra na sajtu Evropskog savjeta za spoljne odnose objavili zajedničku viziju mogućih rješenja spora između dvije zemlje.
U analizi pod nazivom “Rješavanje makedonskog spora oko imena: izgledi za transformacije uzajamnog priznavanja,” dva autora su navela da je ime “Nova Makedonija” najbolje rješenje. Nekoliko dana kasnije, ovaj se naziv pojavio u nekoliko grčkih i makedonskih medija, kao jedna od mogućih opcija za rješavanje decenije starog spora.
Ljatifi i Kalipso su tom tekstu analizirali razne varijante kompleksnijeg imena, počevši od “Republike Makedonije (Skoplje)”. Ovo ime kao opciju, kako kažu autori, prihvatile su obe strane. Međutim, Grci su se ipak predomislili jer strahuju da će se dodatak Skoplje vremenom izgubiti iz naziva.
Prijedlog “Slovenska Makedonija” je proglašen problematičnim sa aspekta neslovenskog stanovništva i drugih etničkih zajednica u Makedoniji. Tu su i prijedlozi na osnovu geografskih odrednica, kao što su Vardarska Makedonija, Sjeverna Makedonija, Centralna Makedonija, Gornja Makedonija, pa čak i Evropska Makedonija.
Najspornija – Vardarska Makedonija
Riječ je o jednostavnim geografskim opisima koje je neko vrijeme favorizovala grčka strana na sastancima u toku prethodnih pregovora. Naziv Vardarska Makedonija stvara više problema nego što rješava.
Tako se zvao dio Makedonije koji je pripao Bukureškim mirom iz 1913. godine Kraljevini Srbiji. Danas većina teritorije Vardarske Makedonije odgovara teritoriji Republike Makedonije (98,09%), dok se ostatak nalazi na teritoriji Republike Srbije (1,91%). To je posebno problematično za Albance, jer neke mape Vardarske Makedonije obuhvataju i dijelove Albanije.
Mnogo su prihvatljiviji nazivi Gornja i Sjeverna Makedonija.
Ipak, Ljatifi i Kalipso smatraju da je najprihvatljiviji naziv Nova Makedonija, jer se radi o relativno mladoj, novoj državi, a i pridjev Nova ima pozitivnu konotaciju, pa tako navode primjere Njujork i Novi Zeland. Kako su rekli taj naziv govori da je Makedonija građanska, a ne etnička država i “moderna država koja gleda u budućnost, a ne u prošlost”.
Međutim, iz Makedonije i Grčke su rekli da se još uvek nije došlo do rješenja ovog problema. Pregovori o iznalaženju rješenja spora Atine i Skoplja u vezi sa nazivom Makedonija vode se od 1992. godine. Posrednik UN u sporu Metju Nimic do sada je održao više sastanaka sa pregovaračima, a posljednji put se sastao početkom decembra u Briselu.
(Blic.rs)
